Ser i avisa at Årdal ikkje lenger vil vera med i supperådet, altså det vi i daglegtale kallar regionrådet. Eg skjønnar dei så vel. Kva er det me får ut av regionrådet slik det vert drive i dag? Ingen verdens ting. Eg forstår at ordførarane våre, dei som Georg Arnestad i SA kallar ein slags assisterande rådmenn. tykkjer det er triveleg å møte kollegaer over ein kopp kaffi. Men dei er valde av oss til å ta politiske grep, gjerne i samarbeide med nabokommunar. Det får dei prioritere fyrst og ta kaffien etterpå.
For rådmenn og byråkratar er sikkert regionrådet eit godt organ for utvikling av samordna og felles kommunal tenesteproduksjon, men me treng ikkje eit regionråd til det. For å finne slike løysingar trengst berre telefonnummerutveksling mellom rådmennene og eit telefonmøte i ny og ne.
Det me treng er eit politisk organ som kan ta samla politiske grep og opptre som ei samla gruppe overfor resten av samfunnet. Å gjera regionen til ein politisk kraftsentrum utad.
Eg trur det er dette ordføraren i Årdal også etterspør, og dersom eg har rett forstår eg han i sin fustrasjon.
Eg håpar alikevel årdølene vert med på ein ekstraomgang. Hugs det var uavgjort etter ordinær tid. Kampen er heilt open.
Ingen kommentarer:
Legg inn en kommentar